विराटनगर । लकडाउन गरिएपनि निक्कै चहलपहल रहने विराटनगरमा आजबाट कडाई गरिएको छ । विराटनगर महानगरमा समेत कोरोना संक्रमित भेटिएपछि प्रशासनले थप कडाई गरेको हो । महानगरपालिकाले संक्रमित भेटिएका दुईवटा वडा समेत सिल गरेको छ ।
विराटनगर महानगरपालिका प्रमुख भीम पराजुलीले संक्रमित भेटिएका वडा नम्बर ६ र १५ सिल गरिएको जानकारी दिए । सो वडामा सर्वसाधारणलाई हिँडडुलमा प्रतिबन्ध लगाइएको छ । जिल्ला प्रहरी कार्यालय मोरङले आइतबार राती सूचना जारी गर्दै लकडाउनलाई थप कडाई गर्ने बताएको थियो । प्रशासनले औषधी, पानी र दुधका पसलमात्र खुल्ने जनाएको थियो ।
आइतबार विराटनगरमा २ जना र धनकुटामा एक जनालाई कोरोना संक्रमण देखिएको थियो । विराटनगरमा संक्रमण पुष्टि भएका पुरुष महानगरपालिकाका सरसफाइ कर्मचारी हुन् । संक्रमित अर्की महिला पाँच दिनअघि भारतबाट आएकी थिइन् । संक्रमणको जोखिम बढेपछि अर्काे सूचना जारी नभएसम्म अति आवश्यक बाहेक अन्य सेवा बन्द गरिएको छ ।
सोमबार विहानबाट प्रहरीले चोक चोकमा सक्रिय भएर लागेका छन् । सधैजसो सामान्य चहलपहल रहने विराटनगरको बजार र सडक पनि सुनसान नै छ संक्रमित भेटिएपछि स्थानीय प्रशासनले आजबाट सम्भावित संक्रमितको खोजी सुरु गरेको छ ।