विराटनगर । नेपाल कम्युनिष्ट पार्टी (नेकपा) का उपाध्यक्ष वामदेव गौतमले प्रधानमन्त्री तथा पार्टी अध्यक्ष केपी शर्मा ओलीलाई सचिवालय, स्थायी कमिटी र आबश्यक परे केन्द्रीय कमिटीको बैठक बोलाउन सुझाएको बताएका छन् ।

बिभिन्न सञ्चारमाध्यममा आएका समाचारका विषयमा आइतबार हस्तलिखित बिज्ञप्ति जारी गर्दै गौतमले भनेका छन्,‘प्रधानमन्त्री केपी ओली र मेराबीच भएका कुराकानीका सम्बन्धमा मनमौजी किसिमले टिकाटिप्पणी भएको मैले पाएँ । पार्टीभित्र र पार्टी र सरकारका बीच, अनि अन्य पार्टी र सरकारका बीच उत्पन्न समस्या समाधान कसरी गर्ने भन्ने सम्बन्धमा छलफल भएको थियो ।’

गौतमद्धारा जारी प्रेसनोटमा समय र परिस्थिति प्रतिकूल जारी अध्यादेशहरु खारेज गरिएपछि पनि अनेकौँ समस्या पार्टीभित्र उत्पन्न भएका स्वीकार गरिएको छ । उनको बिज्ञप्तिमा भनिएको छ, ‘यी समस्या समाधान पार्टी र पार्टी कमिटीलाई बाइपास गरेर गरेर होइन, प्रधानमन्त्रीले प्रत्यक्ष छलफल गरेर र सबै किसिमका विचारहरुको सामना गरेर मात्र गर्न सकिन्छ । तसर्थ, सचिवालय, स्थायी कमिटी र आवश्यक परे केन्द्रीय कमिटीको बैठक बोलाउनुस् । सबभन्दा पहिले सचिवालय बैठक बोलाउन र सबै कमरेडहरुको सुझावलाई सम्मान गर्दै साझा प्रयत्नबाट समस्या समाधान गर्नोस् भनेर मैले प्रधानमन्त्रीलाई सुझाव दिएको हुँ ।’

गौतमले प्रधानमन्त्रीले धैर्यतापूर्वक आफ्नो सल्लाह सुनेको, प्रधानमन्त्री थोरै बोलेको उल्लेख गरेका छन् ।