विराटनगर । राष्ट्रपति विद्यादेवी भण्डारीले सोमबार साँझ दुई अध्यादेश जारी गरकी छन् । मन्त्रिपरिषद्को सोमबार बसेको बैठकले दुई अध्यादेशलाई संशोधन सहित राष्ट्रपतिको कार्यालयमा पेश गर्ने निर्णय गरेको थियो ।
राष्ट्रपतिको कार्यालयद्धारा जारी बिज्ञप्तिमा नेपालको संविधानको धारा ११४ को उपधारा (१) बमोजिम दुई अध्यादेशहरु जारी भएको जनाएको छ । सरकारले संवैधानिक परिषद्(काम, कर्तब्य, अधिकार र कार्यविधि) सम्बन्धी पहिलो संशोधन र राजनीतिक दल सम्बन्धी दोश्रो संशोधन अध्यादेश राष्ट्रपति कार्यालयमा पेश गरेका थियो ।
सरकारले प्रमुख विपक्षी दलको नेताको अनुपस्थितिमा संवैधानिक परिषद्को बैठक बस्न र निर्णय गर्न सक्ने गरी अध्यादेश ल्याउने निर्णय गरेको थियो । त्यस्तै पार्टी विभाजनका लागि संसदीय दलमा मात्र ४० प्रतिशत पुर्‍याउँदा पनि विभाजनले मान्यता पाउने प्रावधान समेटिएको अध्यादेश रहेको छ ।