विराटनगर । मोरङका स्थानीय तहमा ८३ हजार भन्दा बढी घरधुरीले राहत पाएको तथ्याङ्क प्रहरीले सार्वजनिक गरेको छ । जिल्ला प्रहरी कार्यालय मोरङले उपलब्ध गराएको तथ्याङ्कमा जिल्लामा ८३ हजार एकसय १२ घरधुरीले राहत पाएको उल्लेख गरिएको छ । सो तथ्याङ्क अनुसार रतुवामाई नगरपालिकामा भने अहिले सम्म राहतको कुनै प्याकेज उपलब्ध छैन ।
मोरङ प्रहरीका प्रवक्ता तथा डिएसपी मानकुमार राईले रतुवामाईमा अहिले सम्म राहत वितरण गरिएको जानकारी नआएको बताए । डिएसपी राईले भने, ‘हाम्रो मातहतका कार्यालय मार्फत सूचना लिएका हौ । रतुवामाईमा राहत वितरण भएको जानकारी आएको छैन ।’
तथ्याङ्क अनुसार सबैभन्दा बढी विराटनगर महानगरपालिकामा सबैभन्दा बढीले राहत पाएका छन् । महानगरमा २६ हजार २ सय ६८ घरधुरीले राहत पाएका छन् । त्यस्तै सबैभन्दा कम उर्लाबारी नगरपालिकामा राहत वितरण गरिएको छ । उर्लाबारीमा सातसय ९३ घरधुरीले राहत लिएका छन् ।
स्थानीय तहले चामल, दाल, आलु, नुन, तेल, आलु, साबुन, दुध, चिउरा लगायतका सामाग्रीहरु स्थानीयबासीलाई उपलब्ध गराएका छन् ।