विराटनगर । अनेरास्वियूका नेता वसिम आलम अहिले गरिब तथा खान नपाएकाहरुलाई भोजन वितरण गर्दै हिडिरहेका छन् । कोरोना भाइरसको संक्रमण र जोखिम न्यून गर्न सरकारले लकडाउन गरेपछि उनी यो संकटको बेला सक्रिय भएर लागेका छन् । खाना खुवाउने अभियानमा जुटेको उनी पाँचौ दिन भयो । शनिबारसम्म उनले करिब ६ सयजनालाई खाना खुवाई सकेका छन् ।
‘कोरोना भाइरसको हल्ला चल्ने बित्तिकै हामीले जनचेतनामूक कार्यदेखि माक्स पनि वितरण गर्यौ । तर लकडाउन भएपछि सडकमा जीविकोपार्जन गर्नेहरुलाई खाना वितरण गर्न थाल्यौ ।’आलमले विराटपथसँग भने,‘ साथीभाई मिलेर नै यो कार्य गरिरहेका छौ । खाद्य सामाग्री जुटाएका छौ । रोयल बिय्रानी हाउसका कुक छन् । हामी आफै खाना पकाउँछौ । प्याकिङ गरेर सडकमा भएका गरिबलाई बाँड्छौ ।’

आलम मात्र होइन, नेकपा सम्बद्ध अरु युवाहरु पनि यो बेला सामाजिक काममा सक्रिय छन् । युवा संघ मोरङका जिल्ला कार्यालय सदस्य किशोर भट्टराई पनि आाफ्नो क्षेत्रमा जनचेतना र राहत सामाग्री वितरणमा सक्रिय भएर लागेका छन् । शुक्रबार मात्र उनले विराटनगर पुष्पलाल चोकमा रहेको जागृति महिला बृद्धाश्रममा खाद्यान्न, फलफुल र नगद २७ हजार रुपैया सहयोग गरे । ‘सबैले आफ्नो स्थानमा सकेको सहयोग गर्न पाए यो संकटको बेला केही राहत हुने थियो कि भनेर लागेको हो ।’ भट्टराईको भनाई थियो, ‘राजनीति त जहिल्यै गरेपनि हुन्छ । तर बिपत्तिमा सहयोग गर्न सके एक प्रकारको मानवता पनि हो ।’
शनिबार नै युवा संघका केन्द्रीय सदस्य ईश्वरी आचार्यसहितको युवा संघको टोलीले बुढीगंगा गाँउपालिकालाई स्वास्थ्यकर्मीले लगाउने पिपिई उपलब्ध गराएको छ । भट्टराईसहितको टोलीले यस अघि सेनिटाइजर, माक्स वितरणदेखि सुरक्षाकर्मीसँग मिलेर सर्वसाधारणलाई लकडाउनको समयमा घरबाट नहिड्न तथा सवारीसाधान नचलाउन आग्रह गरेको थियो ।

यता बेलबारी नगरपालिकामा युवा संघका नेता माधवराज थापाले सो क्षेत्रका सुकुम्बासी तथा गरिबलाई निशुल्क खाद्यान्न सामाग्री मात्र वितरण गरेनन् । आफ्नो घरमा भाडा बस्नेलाई लकडाउनको अवधिभरि छुट दिने घोषणा समेत गरे । थापाले अहिलेसम्म ७१ परिवारलाई एक महिना सम्म पुग्ने खाद्य सामाग्री वितरण गरिसकेको छन् । थापाको भनाई छ, ‘संकटको बेला त सहयोग गर्ने हो । यस्ता महामारीको बेला सबैले आफ्नो ठाँउबाट सहयोग गर्नुपर्छ ।’