विराटनगर । सत्तारुढ नेपाल कम्युनिष्ट पार्टी मोरङ जिल्ला कमिटिले लकडाउनका कारण अति विपन्न वर्गलाई असहज हुने हुँदा मातहातका कमिटि र जनसंगठनलाई राहत र उद्धारमा केन्द्रीत भई सहयोगमा जुट्न आग्रह गरेको छ ।
नेकपाले एक बिज्ञप्ति जारी गर्दै लकडाउनका कारण अति विपन्न परिवारका बालबच्चा, रोगी, जेष्ठ नागरिक र अन्य भोकै र बिरामी हुन सक्ने भएकाले पार्टी जिल्ला कमिटि, प्रतिनिधिसभा क्षेत्रीय कमिटि, प्रदेशसभा कमिटि, पालिका कमिटि, वडा कमिटि र जनसंगठनहरुले आफु रहेको वडामा केन्द्रीत रहेर समन्वय गर्न आग्रह गरेको छ ।
अध्यक्ष ऋषिकेश पोखरेल, सचिव गणेश उप्रेती शुसिलद्धारा जारी बिज्ञप्तिमा भनिएको छ,‘सबै कमिटिहरु आफ्नो वडामा केन्द्रीत रहि आबश्यक समन्वय गरि उद्धार, राहत र सबैखाले सहयोगमा केन्द्रीत हुन निर्देशित गरिन्छ ।’ बिज्ञप्तिमा सामाजिक संघ संस्थालाई समेत सहयोगका लागि आग्रह गरिएको छ ।
यसैगरि सरकारीले जारी गरेको लकडाउनको पालना गर्न समेत नेकपाले सबैलाई आग्रह गरेको छ।