विराटनगर महानगरपालिकाले नेपाली क्रिकेटरद्वय ललित राजवंशी र दिपेश कँडेललाई सम्मान गर्ने भएको छ ।
नेपाली क्रिकेटलाई विश्वकप छनोटमा पुर्याउने टोलीका सदस्य विराटनगर निवासी ललित र यु–१९ विश्वकप छनोटमा युएईविरुद्धको खेलमा ह्याट्रिक गरी नेपाललाई विजयी बनाउन महत्त्वपूर्ण भूमिका खेल्ने कँडेललाई महानगरपालिकाले सम्मान गर्ने भएको हो ।
महानगरपालिकाले उनीहरूलाई एक लाख एक हजार नगदसहित सम्मान गर्ने निर्णय गरेको महानगर प्रमुख नागेश कोइरालाले जानकारी दिएका छन् ।
यसअघि नै संघीय सरकारले विश्वकप क्रिकेटको क्वालिफायरमा छनोट गराउँदै ऐतिहासिक सफलता दिलाउने राष्ट्रिय क्रिकेट टिमका खेलाडीलाई जनही तीन लाख रुपैयाँ पुरस्कार दिने घोषणा गरिसकेको छ।
यस्तै, सुदूरपश्चिम र मधेश प्रदेश सरकारले पनि आफ्नो प्रदेशबाट राष्ट्रिय टिममा परेका खेलाडीलाई नगदसहित सम्मान गर्ने घोषणा गरिसकेको छ ।
तर, कोशी प्रदेशले भने अहिलेसम्म आफ्नो प्रदेशबाट राष्ट्रिय क्रिकेट टिममा रहेका खेलाडीलाई पुरस्कृत गर्ने वा सम्मान गर्ने विषयमा औपचारिक कुनै निर्णय गरेको छैन ।
