जब पार्टीले मेरो भावना बुझेन

Logo
पर्वतराज निरौला सोमबार, बैशाख २६, २०७९

विराटनगर । समाज रुपान्तरण र विकासका लागि केही गर्ने सोच सानैदेखि थियो । अग्रजहरुले कम्युनिष्ट पार्टीमा लाग्ने सल्लाह दिनुभयो । कलिलो उमेर, सबै कुराको ज्ञान थिएन । २०६४ सालमा जानी नजानी नेकपा एमालेको भातृ संगठन प्रजातान्त्रिक राष्ट्रिय युवा संघ (प्ररायुसंघ) मा आबद्ध भए ।
त्यो बेला प्ररायुसंघ मोरङको जिल्ला अध्यक्षमा रविन थापा हुनुहुन्थ्यो । युवा संघको विराटनगर वडा नं ३ को वडाध्यक्ष हुँदै मेरो राजनीतिक यात्रा शुरु भयो । विराटनगरमा एमालेबाट नयाँ उर्जाका साथ पर्शुराम बस्नेत उदाउनु भएको थियो । बस्नेतको निकट हुँदै मैले प्ररायुसंघको संगठन बिस्तारमा आफ्नो समय दिए । यो यात्रा विराटनगरमा मात्र सीमित थिएन । मेरो रातदिनको समय प्ररायुसंघ कै काममा बित्ने गर्थ्यो ।
राजनीतिक दौडधुपका क्रममा २०६६ सालमा प्ररायुसंघको विराटनगर नगर सचिव हुँदै क्षेत्र नं ६ को क्षेत्रीय अध्यक्ष हुने मौका पाए । यो अवधिमा मैले संगठनका लागि अहोरात्र समय दिए । घामपानी भनिन् । प्ररायुसंघको जिल्ला नेतृत्वमा पुग्ने अभिलाषा थियो । जिल्लामा बसेर काम गर्ने मन थियो । वडा तहदेखि नगर हुँदै क्षेत्र सम्हालेका अनुभव थियो । मैले प्ररायुसंघको जिल्ला सचिव हुने चाहना राखेका थिए । तर एमालेका जिल्ला नेतृत्वको इसारामा मलाई पाखा लगाउने काम भयो । संगठन कै साथीहरुलाई ताली पड्काएर सर्वसम्मतका नाममा मलाई किनारा लगाईयो । मलाई जबरजस्ती ओझेलमा पारियो । राजनीतिमा मलाई अबरोध सृजना गर्ने काम भयो । तर मैले समय आउला भने ।
त्यसपछि म प्ररायुसंघको राजनीतिबाट केही टाढा भए । तर एमाले कै साथीहरुले अखिल नेपाल किसान संघको घटक युवा किसान संघको मोरङ अध्यक्ष बनाउनु भयो । जिल्लामा पार्टी भित्र गुट थियो नै, युवा किसानका अध्यक्ष बनाउन अर्को गुटले आग्रह गरेको थियो । जुन गुट भएपनि पार्टी र संगठन कै हितमा काम गर्ने भनेर लागि परे । त्यसको केही समय बित्न नपाउँदै अर्को गुटले २०७३ सालमा युवा संघ नेपालको युथफोर्संको जिम्मेवारी सम्हाल्न आग्रह गर्यो । युथफोर्स प्रभावकारी भएकाले मैले युथफोर्स मोरङको संयोजकको जिम्मेवारी सम्हाले । त्यो बेला बिकृति, बिसंगतिका बिरोधमा केही राम्रा काम समेत गरे ।
अघिल्लो स्थानीय तहको निर्वाचनको केही दिन अघि म माथि सांघेतिक हमला भयो । चुनावको प्रचारप्रसार ब्यापक थियो । विराटनगर ३ मा करिब ८ जनाको संख्यामा आएका अज्ञात ब्याक्तिहरुले मलाई आक्रमण गरेका थिए । पार्टीका जिम्मेवार नेतालाई यसबारे राम्रोसँग ज्ञात थियो । तर पार्टीले यसबारेमा कुनै चासो लिएन् । एमालेका जिम्मेवार नेताले यसलाई हल्का तवरले सम्झिए । त्यसपछि भने मलाई मन दुख्यो । जुन संगठनमा मैले समय दिए, पसिना बगाए, त्यहि संस्थाले आफुमाथि बेवास्ता गर्दा आफुलाई एक्लो ठाने त्यसपछि म, मेरो भबिश्य खोज्दै काठमाण्डौ पुगे ।
काठमाण्डौमा केही सोच हुँदै गर्दा फेरि एमालेका नेता पर्शुराम बस्नेत मेरो सम्पर्कमा आउनुभयो । वहाँले काठमाण्डौ मै केही गर्नुपर्ने सुझाव दिनुभयो । त्यसपछि एमाले नेता महेश बस्नेत र पार्वत गुरुङ सल्लाहकार रहेको अखिल नेपाल बैदेशिक रोजगार पीडित तथा परामर्श महासंघको केन्द्रीय महासचिव भएर केही समय बिताए र सो महासंघमा रहँदा करिब ४ हजार नेपाली युवाहरुको हकहितका लागि काम गरे । बैदेशिक रोजगारीमा दुःख पाएका धेरैलाई उद्धार गर्ने काममा सहयोग गरे । त्यसपछि भने आफ्नै शैक्षिक परामर्श संस्था खोलेर काम गर्दागर्दै कोरोना महामारीको चपेटामा परे ।
त्यसपछि म फेरि विराटनगर फर्किए । अब भने रोजगारीतर्फ मैले ध्यान दिए । दाई विमल भट्टराईले आफ्नै ठाँउमा केही गर्नुपर्छ भन्ने सल्लाह दिनुभयो । म बशिष्ठ डेभलोभपर्समा आबद्ध भए । तर पनि राजनीति नशाबाट छुटेको थिएन । युवासंघ मै आबद्ध केही नेताहरु संघसँग असन्तुष्ट हुनुहुन्थ्यो, खासगरि पर्शुराम बस्नेत लगायतको टिम । त्यहि टिमले नेपाल खेलकुद महासंघ स्थापना गरेको थियो । महासंघले मलाई केन्द्रीय सचिवालय र विराटनगर महानगरपालिकाको नगर इन्चार्जको जिम्मेवारी दियो । म त्यसमा आबद्ध भएर काम गर्दै थिए ।
तर खेलकुद महासंघमा पनि सन्तुष्ट हुने ठाँउ रहेन् । एकाअर्काको रिसरागले खोलेको संगठन जस्तो लाग्यो । नयाँ शक्ति बनाउने त कता हो कता, युवाहरुलाई नै भड्काउने र एउटा कोठाबाट अर्को कोठामा डेरा सरे जस्तो मात्र आभाष हुन थाल्यो । तनमनले काम गर्दा समेत शंकाको दृष्टिकोणले हेर्न थालियो । आफ्नै संगठन, आफ्नै साथीभाई फेरि गुटगुटमा बिभाजन भएको आभाष हुन थाल्यो । म विमलदाई सँग नजिक थिए । वहाँ नेपाली कांग्रेसको क्षेत्र नं ६ को क्षेत्रीय सदस्य पनि हुनुहुन्छ । वहाँको सल्लाहसँग तरुण दलका युवा नेता रिर्चड गौतम र कांग्रेस विराटनगर नगर सभापति दीपक चापागाईको सल्लाहमा अन्नत म लगायत ७१ जनाको टिम नेपाली कांग्रेसमा प्रवेश गर्यौ ।
(प्रधानमन्त्री तथा नेपाल कांग्रेसका सभापति शेरवहादुर देउवाबाट बैशाख २१ गते कांग्रेस प्रवेश गरेका निरौलासँगको कुराकानीमा आधारित)

 

 

तपाईको प्रतिक्रिया
हाम्रो बारे

लार्ज मिडिया प्रा. लि.
विराटपथ न्यूज पोर्टल कोसी प्रदेशको मुकाम विराटनगरबाट सञ्चालित छ।  सूचना तथा प्रसारण विभाग दर्ता नं 2878/ 2078-079

टिमहरु

अध्यक्ष  : सुष्मा श्रेष्ठ
प्रधान सम्पादक : प्रल्हाद गुरागाई
सम्पादक  : कृष्णप्रसाद कोइराला
बिशेष संवाददाता : सन्तोष दाहाल

सम्पर्क

विराटनगर महानगरपालिका – ९
शान्तिचोक
9851052811/9804005000
[email protected]