विराटनगर । स्थानीय तहको चुनावी प्रचारका लागि प्रधानमन्त्री एवं नेपाली कांग्रेसका सभापति शेरबहादुर देउवा देश दौडाहामा निस्किेका छन् । देउवा आज विराटनगरमा हुने कार्यक्रममा सहभागी हुनेछन् ।
कांग्रेसले आज विराटनगरको पुष्पलाल चोकमा चुनाबी आमसभाको आयोजना गर्दैछ । चुनावी सभामा पार्टी अध्यक्ष देउवा, बरिष्ठ नेता रामचन्द्र पौडेल, महामन्त्री विश्वप्रकाश शर्मा, नेता डा.शेखर कोइराला लगायतले सम्बोधन गर्ने कार्यक्रम रहेको छ । देउवा दिउँसो १२ बजे हेलिकप्टरबाट विराटनगर आउँदैछन् ।
कांग्रेस स्थानीय तह निर्वाचन केन्द्रीय परिचालन समितिले बुधबारदेखि २६ वैशाखसम्मको कार्यक्रमको तालिका सार्वजनिक गरेको छ । ती सबै कार्यक्रममा देउवा लगायत शिर्ष नेताले सम्बोधन गर्नेछन् । कांग्रेसले २२ गते चितवनको भरतपुरमा, २३ गते काठमाडौं, २४ गते बुटवल, २४ गते तनहुँको दमौली र धनुषाको जनकपुरमा चुनावी सभाको आयोजना गरेको छ । २५ गते पोखरा र तुलसीपुर, २६ गते कैलालको धनगढीमा र २७ वैशाखमा डडेलधुरामा चुनावी सभा आयोजना गरेको छ ।
