विराटनगर । नेपाली कांग्रेसबाट विराटनगरका मेयरमा उम्मेदवारी दिएका नागेश कोइरालाले आफू विजयी भए ५० युनिटसम्म विद्युत महशुल मिनाहा गरिदिने बताएका छन् ।
नेपाली कांग्रेस वडा नम्बर विराटनगर १२ समितिले आयोजना गरेको घरदैलौ कार्यक्रममा कोइरालाले विपन्न र ५० युनिटसम्म विद्युत खपत गर्ने महानगरबासीको महशुल मिनाहा गर्ने बताए ।
उनले भने, ‘मेयरमा विजयी भएर आए भने ५० युनिटसम्म विद्युत खपत गर्नेहरुको शुल्क महानगरले व्यवस्थापन गरिदिने छ । यसको लागि स्पष्ट खाका र कार्यक्रम तय गरिने छ ।’
उनले नीजि क्षेत्रबाट सञ्चालित अस्पताल सरह सुविधा दिने अस्पताल महानगरले सञ्चालन गर्ने बताए । सो अस्पतालले नगरवासीलाई सुलभ स्वास्थ्य सेवा उपलब्ध गराउने दाबी कोइरालाको थियो । नगर अस्पताल आफ्नो डिम प्रोजेक्ट रहेको उनले बताए ।
उनले विराटनगरका वडा नम्बर १, ३, ४, ५ र १२ नम्बर वडाका स्थानीयसँग अन्तरक्रिया र घरदैलो कार्यक्रम सम्पन्न गरिसकेका छन् ।