सुनसरी । प्रहरीले सुनसरीको भाण्टाबारीबाट भारी परिणाममा गाँजा सहित एकजनालाई पक्राउ गरेको छ । सुनसरी कोशी गाँऊपालिका – ८ भाण्टाबारी स्थित पुर्बपश्चिम राजमार्गबाट आइतबार एकजनालाई पक्राउ गरेको हो ।
जिल्ला प्रहरी कार्यालय सुनसरीका अनुसार आइतबार बिशेष सूचनाका आधारमा एकसय ६५ केजी गाँजा सहित सोही स्थानमा बस्ने ४० बर्षिय गणेश यादवलाई पक्राउ गरेको जनाएको छ । आईतबार बिहान पौने ३ बजे जिल्ला प्रहरी कार्यालय सुनसरी र सिमा प्रहरी चौकी भण्टाबारीबाट खटिएको प्रहरी टोलीले राजमार्गको दक्षिण पानीटंकी नजिकैबाट गाँजा बरामद गरेको थियो ।
बिक्री वितरणका लागि ठिक्क पारिएर प्लाष्टिकले बेरिएको अबस्थामा ६ बोरा तयारी लागूऔषध गाँजा सहित यादवलाई पक्राउ गरेको प्रहरीको भनाई छ ।पक्राउ परेका यादवमाथि प्रहरीले लागूऔषध नियन्त्रण ऐन २०३३ कारबाहीको प्रक्रिया अघि बढाएको छ ।