विराटनगर । विराटनगरमा जारी छैठौ संस्करणको विराट गोल्डकपमा आज सङ्कटा क्लब काठमाडौँले क्यामरुनको अफ्रिकन रुट्स एसोसियसनसँग प्रतिस्पर्धा गर्दैछ । प्रतियोगिताको यो चौथो तथा अन्तिम क्वाटरफाइनल खेल हो । विराटनगरस्थित सहिद रङ्गशालामा साँझ ७ बजेबाट सुरु सो खेल पश्चात क्वाटरफाइनलको समीकरण पुरा हुनेछ ।

सोमबार भएको तेस्रो क्वाटरफाइनल खेलमा नेपाली पुलिस क्लबलाई २–० गोलले हराउँदै एपिएफले अन्तिम चारमा स्थान पक्का गरिसकेको छ । एपिएफले फाइनल प्रवेशका लागि विराटनगरको सामना गर्नेछ । विराटनगरले शनिबार भारतको युनाइटेड फुटबल क्बल वेस्ट बङ्गाललाई ३–० ले हराउँदै सेमिफाइनलको यात्रा तय गरेको थियो । यस्तै आइतबार ए डिभिजन लिग विजेता मछिन्द्र क्लबलाई २–० गोलले हराउँदै पञ्जाब पुलिसले अन्तिम आठमा स्थान बनाइसकेको छ । सङ्कटा र अफ्रिकन रुट्सबीचको विजेता टोलीले फाइनलका लागि पन्जाब पुलिससँग खेल्नेछ ।