विराटनगर । कोरोना भाइरस (कोभिड–१९) संक्रमण पुष्टि भएका विराट मेडिकल कलेजका तथा विराटनगर अस्पताल प्रालिका अध्यक्ष डा. ज्ञानेन्द्रमान सिंह कार्कीलाई निमोनियाको संक्रमण देखिएको छ । निमोनियाको संक्रमण देखिएपनि स्वास्थ्य अबस्था भने सामान्य रहेको कार्की निकट स्रोतले विराटपथलाई जनाएको छ ।
‘वहाँमा पुरानै निमोनिया बल्झेको हो । निमोनियाको संक्रमण कम भइसक्यो । स्वास्थ्य अबस्था सामान्य छ ।’ कार्की निकट स्रोतले विराटपथलाई भन्यो, ‘हेलिकप्टरबाट ओर्लदा पनि आफ्नो ब्याग आफै बोकेर अस्पताल जानुभयो । त्यस्तो आत्तिनुपर्ने केही छैन ।’
डा. कार्कीलाई शुक्रबार साँझ धरानस्थित वीपी कोइराला स्वास्थ्य विज्ञान प्रतिष्ठानमा भर्ना गरिएको थियो । कोराना संक्रमण पुष्टि भएपछि उनी केही दिन घर मै बसेर आराम गरेका थिए । शनिबार उनलाई हेलिकप्टर चार्टर गरेर टिचिङ अस्पतालको कोभिड–१९ उपचार केन्द्रमा भर्ना गरिएका थिए । छातीमा निमोनिया देखेपछि थप उपचारका लागि त्रिवि शिक्षण अस्पताल भर्ना गरिएको बताइएको छ । बिहीबार विराटनगर महानगरपालिकाको सम्पर्कमा आएका उनलाई शुक्रबार वीपी कोइराला स्वास्थ्य विज्ञान प्रतिष्ठानमा भर्ना गरिएको थियो । तर, शनिबार हेलिकप्टर चार्टर गरेर उनी टिचिङको कोभिड–१९ उपचार केन्द्रमा भर्ना हुन पुगेका हुन् ।
